من طرف جازلي قلت اسدحه لكم اهقيكم تتونسون شوي
Saleh_S_Y
السلام عليكم , حيٌ الله كلٌن في محلة حرام حرم محد يقوم
أول شي بأقوله مشتاقن لكم ولكل عضو يدبي دبي بهالمجموعة الزينة ولكل عضو يفكٌر يسجل ولكل زاير قاعد يقرا هالكلام اللحين
.الا مادريتوا ؟
امس الصباح وانا طالع للدوٌام لقيت ولد جدٌي مبنشر عند الباب
وانا في نفسي اقول عقبال الأربع كفرات يارب 
يوم جيته وأقوله علامك يا عم ؟ قال شوفة عينك منسٌم الكفر وانا يجيني ابليس الملعون ! ويقولي انت كاشخ للدوام ومتزبرق وثوبي مغسلة عند سفيان راعي المغسلة بريالين يا ولد لاتخسٌر نفسك وتوصخ عمرك بالبنشر خل ولد جدٌك يقعد هو وكفرته النايمة .. وانا ابي النحشة يوم انحشت الا شوي الا يطلع ابوي يبي يروح للغنم يم خط الميٌة .. شاف ولد جدٌي يخنبق عند الكفر يصلحها يوم جاه الا ابوي ماسكتة على طيب ما ادري وش وراه اشوف ابوي رفع ثوبه لوسطة وقعد يساعدة .. ثم جاني ابليس مدري رحمن وقتها وقال يالدلخ تخلٌي ابوك يرفع السيارة ويسويها ؟ قلت مافيها حتسي والله ما اخلي ابوي يغيٌر له الكفرة وانا أخش البيت وأفصخ ثوبي واعلقة بالمجلس وأسفط شماغي
وأطلع لهم وأجيب العفريتة ,وقلت لأبوي رح لشغلك وانا بأزين كفرة اخوك هو ولحيته كل بين شعرة وشعرة 1 سانتي
قام ابوي وشغل موترة ومشى
وانا قاعد ازيٌن الكفرة لولد جدٌي , اقوله اللحين يا عم انت كم عمرك ؟ قال لي 76 سنة على وجه الأرض .. قلت طيب ورا شنبك اسود يا عم كأنه خنفس جاي من ضرما أهق
قال انت اللحين تتسوي الكفر والا تتحط دوبك دوب شنبي , قلت لا صحيح يا عم يعني شنبك اسود وابوي اصغر منك وكل ابوي شنبه ولحيته بيضا وغير كذا وش فيك قزم يا عم ؟ احدن واطيك وانت صغيٌر ؟ أحدن راصعك على راسك ايام جدي صويلح الله يرحمه ؟
قال والله ان ماتقطع وتخسى لأدق على ابوك هاللحين والا انت ماعاد ينفع حتسي
أيام العيد
يوم عيد وكلٌن يجي يبوٌس قريبة
وكلن يجي يقول كل سنة وانت طيب الا انا وولد جدٌي طلابه ومطالب بالشارع من قبل اذان الفجر قاعدين نتهاوش شافني اغسٌل سيارتي قبل الفجر بنص ساعة جاني وقال ابيك تغسٌل سيارتي يا ولد فلانه
كلٌها دمن غنم وبرسيم وتبنقلت له دمن الغنم أمرة هيٌن اخذك وامسح بك دمن الغنم أهق
ولو تزودٌها شوي معي يا أخو أبوي علي الحرام انك لتفطر على التبن اللي بصندوق الموتر ! غسلٌت السيارة ونظفتها وطلعت مافيه احسن منها
وانا داخل البيت واطلع للسطوح فوق بأسحب اللي لأمي عشان تبي تغسٌل الحوش الخلفي ,الا انا اشوف من السطح ولد جدٌي عند سيارتي واشوفه يكب شي ابيض عليها من طاسة
وانا اترك اللي بيدي وانزل الا اشوف معه طاسة حليب نياق كابها على كبوت سيارتي والتندة والشنطة
وأقوله وراه ؟ اللحين انا من الساعة وحدة قاعد المع بموتري وتجي انت تكب عليه من حليب نياقك !
زين والله يا ولد جدٌي ان ما اخذتها من قلبك لا تسميني ولد ابوي
وانا اروح واخذ سيارة اخوي فيٌاض وانا انقز لسوق الخضرة اللي على شارع المدينة المنورة - البديعة
وأمر حقين الدجاج وأجي عند خويي حاتم قلت له هات أكبر 4 دجاجات عندك
قال فيه ايه يا بيه ؟ كول سنة وانت طيٌب , قلت وانت طيٌب حبيبي بس عجٌل علي وشف لي اكبر 4 دجاجات عندك , قال توأمر يا باشا وانا اخذهن من عندة بأربع واربعين ريال وانا اروح البيت ويوم شفتهم بيصلون الفجر الا حارتنا هجدت وانا افتح سيارة ولد جدٌي اللي بحوشهم جيب جديد واحط كل دجاجة تحت مرتبة وزعت الأربع في سيارتة
قلت خلٌه عشان اذا صكٌتها الشمس تروح وتطلع الريحة الزينة بسيارتة من نهار العيد الثاني وهو مسافر للديرة يقولي ابوي يقول عيٌنت عمٌك ؟ قلت ولد جدٌي ماغيرة ؟
قال ايه .. قلت وش فيه, قال مودينة المستشفى عيال عمتك حمدة
وراه مودينة يا ابوي ؟ قال استفرغ ثلاث مرات بالبر والظاهر انه تعبان وفيه قل صحة . قلت زييين انه استفرغ اربع دجاجات مهيب هيٌنة يا أبوي أهق يوم جا بيعوٌد للرياض ولد جدٌي حط موترة على سطحة وجابة للرياض وركب له مع كدٌاد خطوط
يقول لأبوي والله اني عجزت أفتح موتري من الريحة اللي فيه ظنتك ان موتري جايته عين والا احدن فاطس فيها ؟ قال ابوي لاااا وانا اخوك انت فيك عين ماصلت على النبي مير لا جيت الرياض نشوف وش الحل مع سيارتك يوم جو للرياض وعياله يفتشون بالسيارة الا يطلعون الدجاج صايرن لونه اخضر
كل عام وانتم بخير , وكل عام وقروبنا الكبير بصحة وسلامة يارب وكلكم يا اعضاء ينعاد عليكم يارب
اليوم عندي اخبار متفركشة مهيب صحفية !
أخبار مهيب صاحية واخبار فاسدة !
بعض الناس الزوايد في جسمة نقمة مهيب نعمة
لاصار المقفى كبير ونشب في عمارة أزرى يطلٌع مقفاة
أول ماقريت الخبر حسبته مصري لكن أخليكم مع الخبر ,
نشب مقفاة ولا قدر يطلع مع الدريشة !
يقول الخبر ..
لندن - تعرض لص في شرق لندن إلى موقف غريب ومحرج للغاية بسبب مؤخرته الضخمة.
فقد حاول اللص البالغ من العمر 36 عاما الدخول إلى أحد المساكن من خلال النافذة ، إلا أن إطار النافذة لم يكن بالحجم الملائم للسماح لمؤخرته الكبيرة بالمرور. ( أنا لو إني منه مسكت مقفاي وشرطتة بالسكين لعنبوه من مقفى بيطيحني بيد الحكومة أهيب صدق
)وأفادت شرطة العاصمة البريطانية لندن إن الرجل انحشر في حديد النافذة ولم يستطع أن يخلص نفسه منه.
وقال متحدث باسم الشركة، "كان نصف جسم الرجل في داخل النافذة ونصفه الاخر في الخارج".
وأضاف المتحدث أنه تم استدعاء رجال الإطفاء الذين قاموا بإزالة إطار النافذة بصورة كاملة حتى يتسنى لهم تحرير اللص من مصيدته الاختيارية. ( جابوا الدفاع المدني يطلع مقفاة وخزياه صدق لعنبوه دام مقفاه كبير وشلون بيركض إذا أحد طردة وهو سارق له جوالات ؟ والله إن يمزعه على مقفاة الا هو على وجهه .. ههههههههههههه الله يدفع البلا بس
غير أن التحريركان مؤقتا اذ ألقت الشرطة القبض على اللص فور تخليصه من النافذة بتهمة الشروع في السرقة.
^
شوفوا وجهه وهو ناشب مقفاة برا وراسة عندي بالصورة
الرجٌال باين عليه نحيف لكن الله يهدية يروح كل يوم لم البوفية ويطلب صحن بطاطس ابو ثلاثة ريال ويقول للهندي كثر مايونيز ولا تحط كتشبوفي ثلاثة شهور طلع مقفاة مايشيلة سروال
وأنطرح الرجال مع الحكومة وشوفوه مسجون اللحين ميساء مغربي أم براطم هذيك
حتى هنود إستراحتنا خاقين عليها يقولون ميسا مقربي سوا سوا مخدة جيب تهت راس بأدين نوم
وانا قد قريت خبر انها بتجي للرياض وقلت وقتها عسى ابو صيٌاح خوينا بالدوام مايدري انها جت والا كان اعرس عليها هههههههههههه جت الحرمة وتوقعنا الهجوم عليها من اشناب شرواي
لكن طلع العكس ولعنوا أم أمها حريم الرياض
يقول الخبر ..
هروب ميساء مغربي بعد هجوم المعجبات عليها بالرياض
بصعوبة بالغة وبعد تدخل عدد من المسؤولات عن الأمن تمكنت ميساء مغربي من مغادرة مسرح مركز الملك فهد الثقافي عقب هجوم مجموعة كبيرة من المعجبات عليها بعد تأديتها دورها في مسرحية “بنات فاطمة” التي تقدم ضمن فعاليات احتفالات عيد الفطر بالرياض.
حدثت الحادثة عندما استغلت الفتيات المعجبات بالفنانة نهاية المسرحية وانقضضن على المسرح
لينهلن عليها بالأحضان والقبلات أهق
مما تسبب في اختناقها وإثارة حالة فوضى في المسرح.( اييييييه يا حزم الضامي صدق اجل لو الرياجيل داخلين بالمسرح ؟ قسم بالله لتروح من صيد امس مقطعة للثلاجة عاد عندنا ربع ماشافوا خير وهذي تجيب عراقيبك وتصبصب عرقك اذا شفت برطمها المنتفخ ! والله يالربع كل ما اشوف براطمها اللي تلمع اسأل امي اقول يا يٌمة هي يوم براطمها تلمع ؟ هي تلحسها بلسانها ؟ والا فيه شي يخلي البراطم كذا تعكس النور من البرقة واللمعة ؟
قالت ايييه وانا امك أترك هذلٌي عنك جيل هبهب وخل عيونك على بنات خالك اللي يحطٌن لمعة حمراء على براطمهن أهق تمكنت الفنانة بعد جهد كبير من النزول عن خشبة المسرح والدخول خلف الكواليس لكن ذلك لم يشفع لها حيث لحقت بها المعجبات خلف الكواليس قبل أن تتدخل مسؤولات الأمن لتفريقهن عن الفنانة التي فوجئت بما حدث. ( الوكاد انها انحاشت وعطت الدرب الأخضر , ويقولون انها صرٌحت في مؤتمر صحفي تقول اني بغيت أروح من صيد ذيك الليلة مير فكٌني الله
عاد أتخيٌل انا يوم قريت الخبر , يالله بس لو لي معجبات ويجوني يركضون .. يا شيخ والله لأقرط في ثوبي وأجيهم أركض حتى انا ههههههههههههه
تجاوز عدد الحاضرات للمسرحية في يومها الثالث أكثر 10 آلاف سيدة قدمن من مختلف محافظات المملكة ( والله مهيب هيٌنة أم براطم تلمع هذي , أنا أقطع نص يدي ان ماكان وسط العشرة الالاف هذي رياجيل لابسين عبايات ههههههههههه ولقوها فرصة بعد الحفل يخمخمون المرة ويبوسنها أعقبوا لارحمتوا هههههههههههه
رمضان شهر خير وشهر عبادة
مايختلف على هذي اثنين الا ان كان واحد منهم مضروب بعلبة حليب ابو قوس على راسة !نشوف التراويح , ونشوف القيام واهم ساعات برمضان تالي الليل
تالي الليل تقوم علينا شياطين الأنس وتجيب قناة ام بي سي هالحليمة كأنها مغطوطة في كيس من كثر الوصاخة اللي تحطها على وجهها لا وتلف راسها وهي تكلم وتحندر بعيونها
حليمة بولند: أتمنى الشفاء لسعودي قطع يده بسببي !
استاءت المذيعة الكويتية حليمة بولند من الشائعات التي تطولها من كل حدب وصوب في كل مكان
موضحة أن هناك من يرصدونها في كل الأوقات لاستغلال من اي جانب للبحث عن الاثارة الاعلامية.
جاءت تصريحات بولند ،عقب راوج شائعة قطع مواطن سعودي ليده بسكين حاد أثناء وجوده برفقة أصدقاء فى إحدى الاستراحات بمدينة حائل وهو يشاهد برنامج "مسلسلات حليمة" في شهر رمضان المبارك، حيث قالت بولند :" إذا كان الخبر صحيحا فأتمنى الصحة والسلامة له والشفاء العاجل بأقرب وقت". ( إيه ابد خلاص التمت يدة وطاب الجرح وتسن شي ماصار من تمنياتك له بالسلامة والشفاء العاجل بأقرب وقت الله ياخذك انتي وفساتينك
كان مصدر طبي بمستشفى الملك خالد أكد صحة الحادثة، موضحا أن المواطن السعودي (خ. م)، 41 عاما قد جاء إلى قسم الطوارئ بالمستشفى، في تمام الساعة الثالثة والنصف فجرا، وهو يعاني من قطع مفتوح في راحة اليد وينزف بشكل حاد، نظرا لعدم تقديم الإسعافات الأولية اللازمة له من خلال الضغط على الشريان الرئيسي الذي يمد المنطقة المصابة بالدم. ( هذا حمار اللي سوى هالحركة لعنبوه اقطع يدي عشان كسرة حرمة لاقامت ولاقعدت هندي وصعايدة وبنقالي مخنز في اباطة كيلوين شعر قاعد يتابعها ! خلها تولي
الوكاد اني والله اليا جيت اتسحر لبست سروالي المقلٌم وعطيتها مقفاي
وتبربر وراي ما ادري وش تقول ماغير اقطع من اللحم واكل رز واشرب اللبن ويالله من فضلك
:
.
:
على كذا قضيت , وإن شاء الله مع أخبار جديدة او موضوع جديد للمنتدى اللحنان بإذن الله ,
تحياتي يا مطانيخ
منقوله لعيونكم
مشكوره يا الغاليه على الرد
» طريقة عمل بسبوسة (كاروهات القشطة) !! >
» خلطات لتبيض الوجه والجسم بدون استثناء
» انقلع بس انقلع
» استعادة العذرية حلم فتيات وزوجات خليجات
» أفخم فساتين من الشالكي لخريف وشتاء 2011
» مندي بالظبط مثل المندي الحضرمي
» أذكار يومية لأطفالنا الصغار بالصور
» ديكورات تتعبك